ڈاکٹر علامہ محمد اقبال کے سنہری الفاظ

قرآن اس لئے نازل ہوا ہے کہ وہ انسان میں خدا سے ربط قلبی کا اعلیٰ شعور پیدا کردے تاکہ انسان اس ربط کی بدولت مشیت ایزدی سے ہم آہنگی پید کرسکے۔

(روزگار فقیرجلد اول ص 156)

میرے نزدیک حقیقی آرٹسٹ وہ ہے جو اپنی قوم کا نبض شناس ہو اور آرڑ کو قومی امراض کے دفیعہ کا ذریعہ بنائے۔

(انوار اقبال ص 35)

اس گوہر نایاب کی تلاش میں رہو جو بادشاہوں کے خزانوں میں نہیں مل سکتا بلکہ کسی خرقہ پوش کے پاؤں کی خاک میں اتفاقیہ مل جاتا ہے ۔

(انوار اقبال ص 36)

تقدیر الٰہی سے کوئی چارہ نہیں ، مسلمان کے لئے تسلیم کے سوا کوئی راہ نہیں اور یہی راہ انسب و اولیٰ ہے ۔ 

(انوار اقبال ص 52)

وہ شخص جو دین کو سیاسی پروپیگنڈے کا پردہ بناتا ہے۔ میرے نزدیک لعنتی ہے ۔ 

(انوار اقبال ص 75)

جن لوگوں کے عقائد و عمل کا ماخذ کتاب و سنت ہے اقبال ان کے قدموں پر ٹوپی کیا سر رکھنے کو تیار ہے اور ان کی صحبت کے ایک لحظہ کو دنیاکی تمام عزت و آبرو پر

ترجیح دیتاہے ۔ 

(انوار اقبال ص 168)

عام مسلمانوں کی طرح میرابھی یہی عقیدہ ہے کہ حضور رسالتمآب کی زیارت خیر و برکت کا باعث ہے ۔ 

(انوار اقبال ص186)

دین اسلام جو ہر مسلمان کے عقیدے کی روسے ہر شے پر مقدم ہے نفس انسانی اور اس کی مرکزی قوتوں کو فنا نہیں کرتا بلکہ ان کے لئے حدود متعین کرتا ہے ۔

(انوار اقبال ص 216)